Haqqımızda

AKİB olaraq məqsədimiz vətəndaş cəmiyyətinin inkişafına dəstək vermək, sosial, iqtisadi, ekoloji problemlərin həllinə töhfə vermək, könüllülük hərəkatının fəaliyyətini genişləndirmək və gənclərin beynəlxalq inteqrasiyasını təmin etməkdir.

Gənclərin könüllü fəaliyyətə marağını artırmaq, istedadlı və yaradıcı gənclərin iştirakını təmin edərək könüllülük hərəkatına rəng qatmaq üçün mütəmadi olaraq müxtəlif layihələr həyata keçiririk. Biz könüllülüyü yalnız beynəlxalq səviyyəli tədbirlərin təşkili ilə məhdudlaşdırmır, həm də yerli icmaların inkişafı, ekoloji, sosial və digər aktual problemlərin həllində birgə fəaliyyətin vacibliyini vurğulayırıq. Yeniyetmə və gənclərin könüllülük haqqında məlumatlandırılması və biliklərinin artırılması olduqca zəruridir. Bu istiqamətdə qeyri-hökumət təşkilatlarının üzərinə böyük məsuliyyət düşür.

Keçirdiyimiz maarifləndirici layihələrdə müşahidə edirik ki, gənclər ekoloji problemlər və onların həlli yolları, eləcə də bu sahədə həyata keçirilən dövlət proqramları barədə kifayət qədər məlumatlı deyillər. Bu səbəbdən qeyd olunan sahədə könüllülük fəaliyyətini genişləndirmək və regionlarda yaşayan yüzlərlə gəncin iştirakını təmin etmək məqsədilə ekoloji layihələr və proqramlar həyata keçirməyi hədəfləyirik.

Avropa Şurasının qərarı ilə Azərbaycan Könüllülər İctimai Birliyi 2005-ci ilin nəticələrinə əsasən Avropa Gənclər Mükafatı (European Youth Award) ilə təltif olunaraq Avropada ilin gənclər təşkilatı seçilmişdir. Həmçinin, “2 fevral – Gənclər Günü” münasibətilə 2013-cü ildə uğurlu fəaliyyətinə görə mükafatlandırılmışdır.